សេចក្តីប្រកាសព័ត៌មានបន្ទាន់ និងសេចក្តីថ្លែងការណ៍រួមនៃសមាជ AGPA – ថ្ងៃទី១៥ ខែវិចិ្ឆកា
សេចក្តីប្រកាសព័ត៌មានជាបន្ទាន់របស់ APGA
ភ្នំពេញ ប្រទេសកម្ពុជា ថ្ងៃទី១៥ ខែវិចិ្ឆការ ឆ្នាំ២០១២៖ សមាជប្រជាជនអាស៊ាន (AGPA) បានធ្វើឡើងនៅទីលានប្រជាធិបតេយ្យ ដែលនៅចំកណ្តាលរាជធានីភ្នំពេញ។ ទោះជាមានវត្តមានដ៏ច្រើននៃកងកម្លាំងប៉ូលីស និងអាកាសធាតុអាក្រក់ក៏ដោយ ក៏មានអ្នកចូលរួម ២.០០០ នាក់ មកចូលរួមនៅក្នុងសមាជនេះ ដែលផ្តោតទៅលើការព្រាងនូវសេចក្តីថ្លែងការណ៍រួម ដែលនឹងត្រូវផ្ញើទៅរដ្ឋាភិបាលអាស៊ាន និងរាជរដ្ឋាភិបាលកម្ពុជា។
សមាជចាប់ផ្តើមនៅម៉ោង ៧៖៣០ នាទី ដោយមានការជួបជុំគ្នា។ អស់ពេលពេញមួយថ្ងៃ ពួកគេជួបជុំគ្នា ច្រៀងចម្រៀង រាំ និងមានការសម្តែងផ្សេងៗជាច្រើន។ មានក្រុម និងបណ្តាញផ្សេងៗ ដែលបង្កើតបានជាបណ្តាញគ្រប់ផ្នែកនៃប្រជាជនកម្ពុជា និងអ្នករៀបចំកម្មវិធីរបស់ AGPA ក៏បានផ្លាស់វេនគ្នាធ្វើបទបង្ហាញអំពីលទ្ធផលនៅក្នុងសិក្ខាសាលាកាលពីម្សិលមិញ (រួមមាននូវអ្វីដែលពួកគេចង់ឲ្យ រាជរដ្ឋាភិបាលកម្ពុជា និងសមាជិកដទៃទៀតរបស់អាស៊ានដោះស្រាយអំពីការព្រួយបារម្ភខុសៗគ្នារបស់ពួកគេ។
លោក វ៉ន ពៅ អ្នករៀបចំកម្មវិធីម្នាក់នៃអ្នករៀបចំស្នូលនៃព្រឹត្តិការណ៍ AGPA បានពន្យល់នូវហេតុផលដែលពួកគេព្រាងសេចក្តីថ្លែងការណ៍ថា៖ “យើងខ្ញុំ ជាអ្នកតំណាងនៃអង្គការសង្គមស៊ីវិលនៅថ្នាក់មូលដ្ឋាន មិនមានការសប្បាយចិត្តនោះទេ។ វាហាក់ដូចជារាជរដ្ឋាភិបាលព្យាយាមបិទបាំងការពិតអំពីអំពើអាក្រក់ដែលត្រូវបានប្រព្រឹត្តដោយអាជ្ញាធរក្នុងតំបន់របស់ខ្លួន។ រាជរដ្ឋាភិបាលកម្ពុជា មិនបានគោរពតាមគោលការណ៍អាស៊ាន រដ្ឋធម្មនុញ្ញ និងគោលការណ៍នីតិរដ្ឋនោះទេ”។
ក្នុងអំឡុងពេលសមាជ សេចក្តីថ្លែងការណ៍ពីរ ត្រូវបានផ្សាយដល់អ្នកចូលរួម។ សេចក្តីថ្លែងការណ៍ទីមួយ និយាយអំពីសំណើរសម្រាប់អាស៊ាន ដែល AGPA គ្រោងនឹងលើកឡើងដល់រាជរដ្ឋាភិបាលកម្ពុជានាថ្ងៃស្អែក។ សេចក្តីថ្លែងការណ៍ទីពីរ គឺជាសំណើរសម្រាប់រាជរដ្ឋាភិបាលកម្ពុជា។ សេចក្តីថ្លែងការណ៍ទាំងពីរ ត្រូវបានអានលឺៗទៅកាន់មនុស្សម្នា ដើម្បីប្រមូលអារម្មណ៍ពួកគេបញ្ចូលក្នុងអត្ថបទ ធ្វើការបង្ហើយនូវមតិឆ្លើយតបដែលត្រូវបានបញ្ចូលក្នុងអត្ថបទចុងក្រោយនៃសេចក្តីថ្លែងការណ៍ទាំងពីរ។
អត្ថបទចម្លងនៃសេចក្តីថ្លែងការណ៍ទាំងពីរ អាចរកបាននៅក្នុងឯកសារដែលភ្ជាប់មកជាមួយ។
ទោះជាសមាជ ត្រូវបានអនុញ្ញាតឲ្យបន្តដំណើរការដោយគ្មានការរារាំងរបស់អាជ្ញាធរក៏ដោយ ដែលអាជ្ញាធរមួយចំនួនបានបង្ហាញ និងបានយល់ព្រមឲ្យមានព្រឹត្តិការណ៍ AGPA ជាមួយហេតុផលដែលបានព្រមព្រៀងគ្នារួចហើយ ក៏នៅកន្លែងផ្សេងទៀតអាជ្ញាធរនៅតែមិនបានគោរពសិទិ្ធសេរីភាពជាមូលដ្ឋានរបស់ប្រជាពលរដ្ឋឡើយ។ នៅភូមិថ្មគោលដែលនៅក្បែររបងព្រលានយន្តហោះអន្តរជាតិភ្នំពេញ អាជ្ញាធរបានចាប់ខ្លួនអ្នកភូមិ ៨នាក់ (ស្ត្រី ៦ បុរស ២ នាក់) ដែលពួកគាត់បានសរសេរអក្ស SOS “រកជំនួយ” នៅលើដំបូលផ្ទះរបស់ពួកគេ ដោយសង្ឃឹមថាលោកប្រធានាធិបតី ប៉ារាក់អូប៉ាម៉ា អាចឃើញនៅពេលដែលគាត់មកដល់ នូវការស្វែងរកជំនួយ និងការពារពីការបណ្តេញចេញដោយបង្ខំ ដែលកំពុងគម្រាមកំហែងពួកគាត់។
លោក ហេង សុជាតិ អ្នករៀបចំស្នូលនៃសមាជ AGPA បានមានប្រសាសន៍ថា៖ “ស្របពេលដែល សមាជ AGPA បានកើតឡើងដោយមានការជ្រៀតជ្រែក និងរំខានបន្តិចបន្ទួចនោះ ក៏មានការព្យាយាមជាច្រើនពីខាងរាជរដ្ឋាភិបាលក្នុងការធ្វើឲ្យសហគមន៍អន្តរជាតិចាប់អារម្មណ៍កោតសសើរនៅមុនកិច្ចប្រជុំកំពូលអាស៊ាន ដែលជាការបន្តនូវគោលនយោបាយរបស់ខ្លួន៖ “នៅឲ្យស្ងៀម បើមិនអញ្ជឹងទេយើងនឹងឃុំឃាំងអ្នក” ប៉ុន្តែការឃាត់ខ្លួនថ្មីៗនេះទៅលើអ្នកតំណាងសហគមន៍ចំនួន ៨នាក់ ដែលរស់នៅក្បែរព្រលានយន្តហោះ គឺជាការរំលឹកមួយយ៉ាងខ្លាំងដល់អ្នកដែលមកប្រទេសកម្ពុជាសម្រាប់កិច្ចប្រជុំអាស៊ាន ថាការរំលោភសិទិ្ធមនុស្ស គឺជាជំងឺមួយនៅកម្ពុជា”។
សមាជប្រជាជនអាស៊ាន
សេចក្តីថ្លែងការណ៍របស់ប្រជាជន
ថ្ងៃទី១៥ វិច្ឆិកា ២០១២
យើងខ្ញុំទាំងអស់គ្នា ដែលចូលរួមក្នុងសមាជប្រជាជនអាស៊ាន ជាកសិករ ប្រជានេសាទ សកម្មជនព្រៃឈើ សកម្មជនដីធ្លី ជនជាតិ ដើមភាគតិច អ្នកគាំទ្រលើស្រ្តី សកម្មជនការងារ អ្នកបម្រើសេវាផ្លូវភេទ សកម្មជនយុវជន សម្មជនប្រឆាំងការបណ្តេញចេញ សកម្មជនប្រឆាំង នឹងមូលធននិយម សកម្មជនអ្នកស្រឡាញ់ភេទដូចគ្នា សកម្មជនដែលរងការប៉ះពាល់ពី គម្រោងវារីអគ្គីសនី សិល្បករ និងអ្នកចម្រៀង។ យើងខ្ញុំមកចូលរួមគ្នានៅទីនេះ តាមរយៈ សម្ព័ន្ធភាពថ្នាក់តំបន់និងមិត្តិភក្តិ។ យើងខ្ញុំធ្វើសមាជមិនមែនក្នុងបំណងប្រឆាំងរដ្ឋាភិបាល នោះទេ។ យើងខ្ញុំជាប្រជាជនដែលស្នេហាសន្តិភាព និងមានប្តេជ្ញាចំពោះអហិង្សាសកម្ម។ យើងខ្ញុំជឿជាក់លើសិទ្ធិមនុស្ស សិទ្ធិពលរដ្ឋ និងសេចក្តីថ្លៃថ្នូរ ដែលជាហេតុនាំអោយ យើងខ្ញុំបានរៀបចំសមាជនោះឡើង។
សមាជរបស់យើងខ្ញុំ ត្រូវបានគ្រោងឡើងដើម្បីលើកឡើងនូវសម្លេងរបស់ប្រជាជន និងបញ្ហារបស់ពួកគាត់ទៅដល់រាជរដ្ឋាភិបាលកម្ពុជា មេដឹកនាំប្រជាជាតិអាស៊ាន ព្រមទាំង មេដឹកនាំអន្តរជាតិផ្សេងៗនៅមុនពេលកិច្ចប្រជុំកំពូលអាស៊ានលើកទី២១ ដែលនឹងប្រព្រឹត្តទៅ នៅថ្ងៃ១៨ ដល់ថ្ងៃ២០ខែវិច្ឆិកា ២០១២នេះ។
សមាជប្រជាជនអាស៊ាន គឺជាព្រឹត្តិការណ៍រយៈពេលបួនថ្ងៃ ដើម្បីប្រមូលផ្តុំប្រជាជន នៅតាមមូលដ្ឋាន ក្នុងស្មារតីសាមគ្គីភាពនឹងគ្នា តស៊ូដើម្បីយុត្តិធម៌សង្គម ជីវភាពប្រសើរឡើង និងដើម្បីធ្វើអោយសង្គមប្រសើរឡើងសម្រាប់គ្រប់ៗគ្នា។ យើងខ្ញុំទាំងអស់គ្នាបានចែករំលែក ផ្លាស់ប្តូរបញ្ហាគ្នា ហើយនាំគ្នាស្វែងរកដំណោះស្រាយ។ យើងខ្ញុំដឹងថានៅពេលប្រជាជននិង រដ្ឋាភិបាលនានារួមគ្នាធ្វើកិច្ចការ នោះគេនឹងអាចរកឃើញនូវដំណោះស្រាយល្អៗនិង យូរអង្វែង។ នេះហើយគឺជាគោលដៅសមាជរបស់យើងខ្ញុំ។
នៅថ្ងៃទី១នៃសមាជប្រជាជនអាស៊ាន យើងខ្ញុំ បានជួបបញ្ហាការរាំងខ្ទប់មកលើ សេរីភាពធ្វើសមាជរបស់យើង។ ការរាំងខ្ទប់នេះ នៅតែបន្ត។ នៅថ្ងៃទី២ យើងខ្ញុំបានធ្វើកិច្ច ប្រជុំផ្សេងៗ ដោយយើងបានពិភាក្សាគ្នាអំពីបញ្ហារបស់យើងរួមគ្នា ដើម្បីរៀបចំតាក់តែង សេចក្តីថ្លែងការណ៍មួយនេះ យើងខ្ញុំបានជួបបញ្ហាបន្ថែមទៀតចំពោះការប៉ុនប៉ងកៀបសង្កត់ មកលើសេរីភាពមូលដ្ឋានរបស់យើងខ្ញុំ គឺសេរីភាពប្រជុំគ្នានិងសេរីភាពចងក្រង គ្នាជាសហគមន៍។ ក៏ប៉ុន្តែនៅថ្ងៃនេះយើងខ្ញុំនៅទីនេះ និងប្រាថ្នាចង់បង្ហាញជូននូវជីវិតពិត របស់យើងខ្ញុំ និងកម្លាំងនៃសេចក្តីសង្ឃឹមនិងសុបិន្តសម្រាប់អនាគតរបស់យើងខ្ញុំនៅក្នុង ប្រទេសកម្ពុជា និងក្នុងសហគមន៍អាស៊ាន។
ចំពោះមេដឹកនាំទាំងអស់៖ យើងខ្ញុំកំពុងថ្លែងទៅកាន់អស់លោក សូមអស់លោកស្តាប់ សម្លេងរបស់យើងខ្ញុំ និងស្តាប់លឺបញ្ហារបស់យើងខ្ញុំផង!
យើងខ្ញុំគឺជាប្រជាជន ជាផ្នែកនៃដំណោះស្រាយ។ យើងខ្ញុំមិនមែនជាផ្នែកបញ្ហាទេ។ យើងខ្ញុំចង់រួមធ្វើកិច្ចការជាមួយអស់លោកដើម្បីដោះស្រាយបញ្ហារបស់យើងខ្ញុំ។
អនុសាសន៍៖
១. វិស័យការងារ (កម្មករក្នុងប្រព័ន្ធ ក្រៅប្រព័ន្ធ និងពលករចំណាកស្រុក)
- យើងទាមទារអោយពង្រឹងការអនុវត្តច្បាប់ការងារក្នុងប្រទេសកម្ពុជា
- យើងទាមទារសិទ្ធិសេរីភាពចងក្រងបណ្តាញសហគមន៍និងប្រជុំដោយគ្មានប្រឈម នឹងអំពើហិង្សា
- យើងទាមទារប្រាក់ខែចិញ្ចឹមជីវិតសមរម្យសម្រាប់កម្មករ មន្ត្រីរាជការ ដើម្បីកែតម្រូវ ទៅតាមអតិផរណាជាប្រចាំ
- យើងទាមទារអោយមានសេវាសាធារណៈប្រកបដោយប្រសិទ្ធភាពនិងតម្លាភាព ក្នុងប្រទេសកម្ពុជា
- យើងទាមទារអោយបញ្ចប់កិច្ចសន្យាការងាររយៈពេលខ្លី
- យើងទាមទារការវិនិយោគដែលផ្តល់លទ្ធភាពដល់កម្មករផ្នែកក្រៅប្រព័ន្ធ ដើម្បីលើកស្ទួយជីវភាពអោយបានសមរម្យ
- យើងទាមទារការទទួលស្គាល់ និងការគោរពចំពោះសិទ្ធិចចារគ្នារបស់កម្មករផ្នែកក្រៅ ប្រព័ន្ធ
- យើងទាមទាររបបបេឡាសន្តិសុខសង្គមសម្រាប់កម្មករផ្នែកក្រៅប្រព័ន្ធ
- យើងទាមទារបញ្ចុះតម្លៃប្រេងសាំងក្នុងប្រទេសកម្ពុជាដូចប្រទេសជិតខាង។
- យើងទាមទារពលករចំណាកស្រុកទទួលបានសិទ្ធិបង្កើតនិងចូលរួមសហជីព
- យើងទាមទាររដ្ឋាភិបាលអាស៊ានទាំងអស់សូមអោយទទួលស្គាល់និងពង្រឹងសិទ្ធិ មនុស្សរបស់ពលករចំណាកត្រូវមានសិទ្ធិទទួលបានប្រាក់បៀរវត្សន៍ស្មើគ្នា និងសេវា សាធារណៈផ្សេងៗទៀតដូចនឹងកម្មករក្នុងស្រុកដែរ។
- អ្នកបម្រើផ្លូវភេទទាមទារសេរីភាពចូលរួមក្នុងចលនាសម្រាប់ប្រជាជនទាំងអស់នៅក្នុងសហគមន៍អាស៊ាន
- សេវាផ្លូវភេទក៏ជាការងារដែរ។ យើងត្រូវតែផ្លាស់ប្តូរច្បាប់និងគោលនយោបាយនៅក្នុងប្រជាជាតិអាស៊ានទាំងអស់ ដើម្បីការពារសិទ្ធិអ្នកបម្រើផ្លូវភេទរួមទាំងអ្នកបម្រើផ្លូវភេទ ដូចគ្នា(LGBT).
- យើងខ្ញុំជាអ្នករត់ម៉ូតូឌុប តុតុ សូមទាមទារអោយបញ្ឈប់ការជួលកង់និងម៉ូតូនៅទី កន្លែងទេសចរណ៍។
២. ដីធ្លី
- យើងខ្ញុំសូមទាមទារឲ្យរាជរដ្ឋាភិបាលវាយតម្លៃ និងលើកឡើងជាថ្មីនូវផលប៉ះពាល់អវិជ្ជមាននៃសម្បទានដីសេដ្ឋកិច្ច
- យើងខ្ញុំសូមទាមទារឲ្យបញ្ឈប់ការបណ្តេញចេញដោយបង្ខំ និងអនុវត្តគោលនយោបាយការអភិវឌ្ឍន៍នៅនឹងកន្លែង
- យើងខ្ញុំសូមទាមទារឲ្យបញ្ចប់ប្រព័ន្ធយុត្តិធម៌ដែលបោកបញ្ឆោត និងអំពើហិង្សាប្រព្រឹត្តដោយរដ្ឋ និងបុគ្គលមិនមែនរដ្ឋ ដែលជាការចោទប្រកាន់ជាបទល្មើសឧក្រិដ្ឋ និងវាយប្រហារមកលើអ្នកការពារសិទិ្ធមនុស្ស និងសកម្មជនដីធ្លី
- យើងខ្ញុំ ជាសមាជិកសហគមន៍ដែលត្រូវបានគេបណ្តេញចេញ សូមទាមទារឲ្យរាជរដ្ឋាភិបាលចេញដល់យើងខ្ញុំនូវឯកសារផ្លូវច្បាប់នៃភាពជាពលរដ្ឋផ្លូវការរបស់រដ្ឋ (សៀវភៅគ្រួសារ អត្តសញ្ញាណប័ណ្ណ) ដូចនេះយើងអាចទទួលបានកម្មសិទិ្ធដីធ្លី និងទាមទារសំណងពីការយកដីធ្លីរបស់យើង
- យើងខ្ញុំសូមទាមទារឲ្យដោះលែងសកម្មជនសិទិ្ធមនុស្ស និងសកម្មជនដីធ្លីដែលជាប់ក្នុងពន្ធនាគារ
- យើងខ្ញុំសូមទាមទារឲ្យប្រទេសកម្ពុជាគោរពសិទិ្ធមនុស្ស លទិ្ធប្រជាធិបតេយ្យ និងបញ្ឈប់ការរើសអើងប្រឆាំងនឹងអ្នកក្រ
- យើងខ្ញុំសូមទាមទារឲ្យរាជរដ្ឋាភិបាលបង្កើតគោលនយោបាយ និងច្បាប់ទាក់ទងនឹងដីធ្លី ធនធានរ៉ែ និងទំនប់វារីអគ្គីសនី ដែលបំរើឲ្យផលប្រយោជន៍រាស្ត្រ
- យើងខ្ញុំទាមទារឲ្យលុបចោលនូវគោលនយោបាយដីសម្បទានសេដ្ឋកិច្ចនៅក្នុងតំបន់អាស៊ាន
- យើងខ្ញុំទាមទារឲ្យអាស៊ានបង្កើតយន្តការ និងគោលនយោបាយនានាសម្រាប់ការបែងចែកដីធ្លីដល់ប្រជាពលរដ្ឋ
- យើងខ្ញុំសូមទាមទារឲ្យរដ្ឋាភិបាលប្រទេសសមាជិកអាស៊ានការពារតំបន់ដែលសំបូរដោយធនធានជីវចំរុះ
- យើងខ្ញុំសូមទាមទារឲ្យការបង្កើតគោលនយោបាយនៅក្នុងតំបន់អាស៊ាន មានការគោរព និងលើកកំពស់ការចូលរួមរបស់ប្រជាពលរដ្ឋ សិទិ្ធប្រជាពលរដ្ឋ និងមិនត្រូវបង្កើតឲ្យមានការបណ្តេញចេញដោយបង្ខំ និងរើសអើងប្រឆាំងនឹងអ្នកក្រទេ
- យើងខ្ញុំស្នើសុំដល់រដ្ឋាភិបាលប្រទេសសមាជិកអាស៊ាន ឲ្យចេញនូវសេចក្តីថ្លែងការណ៍រួមក្នុងការអំពាវនាវឲ្យមានដំណោះស្រាយរឿងជម្លោះដីធ្លីនៅក្នុងតំបន់អាស៊ាន
៣. សន្តិសុខ និងអធិបតេយ្យភាពស្បៀង
- យើងខ្ញុំទាមទារឲ្យមានទីផ្សារយុត្តិធម៌ និងតម្លៃយុត្តិធម៌សម្រាប់ផលិតផលរបស់យើង
- យើងខ្ញុំទាមទារឲ្យមានឥណទានទាបពីរាជរដ្ឋាភិបាល គឺ អត្រាការប្រាក់ ២% ក្នុងមួយឆ្នាំ
- យើងខ្ញុំទាមទារឲ្យមានការគាំទ្រផ្នែកបច្ចេកទេសកសិកម្មពីរាជរដ្ឋាភិបាល
- យើងខ្ញុំសូមបដិសេធច្បាប់ស្តីពីកសិកម្មទាំងឡាយណាដែលផ្ទុយពីរដ្ឋធម្មនុញ្ញ និងច្បាប់ភូមិបាលរបស់យើង
- យើងខ្ញុំសូមទាមទារឲ្យមានច្បាប់ការពារអំណាចនៃការតថ្លៃរវាងអ្នកផលិតផលិតផលកសិកម្មតូចតាច និងពាណិជ្ជករ/អ្នកទិញ
៤. ពាណិជ្ជកម្ម និងការវិនិយោគ
- យើងខ្ញុំទាមទារឲ្យការអភិវឌ្ឍន៍គួរតែមិនមែនធ្វើឲ្យប្រជាពលរដ្ឋកាន់តែក្រីក្រនោះទេ
- ពាណិជ្ជកម្ម និងការវិនិយោគគួរតែជាដំបូង និងសំខាន់ពង្រឹងនូវសេដ្ឋកិច្ចក្នុងតំបន់ ផលិតផលក្នុងតំបន់ សមត្ថភាពធនធានមនុស្ស និងសុខុមាលភាពរបស់ប្រជាពលរដ្ឋ។ ប្រាក់ចំណេញរបស់វិនិយោគិន គួរតែមិនត្រូវនៅមុខផលប្រយោជន៍របស់ប្រជាពលរដ្ឋនោះទេ
- យើងខ្ញុំសូមទាមទារឲ្យមាននូវលទ្ធភាពទទួលបានការថែទាំសុខភាពទូទាំងពិភពលោក និងសម្រាប់ប្រទេសរបស់យើងក្នុងការមានសិទិ្ធផលិតឱសថតាមប្រភេទផ្ទាល់ខ្លួន
- យើងខ្ញុំសូមជំរុញឲ្យរាជរដ្ឋាភិបាលក្នុងការអនុវត្តច្បាប់ និងបទបញ្ជាដែលពង្រឹងដល់ គុណភាពនៃការអប់រំ និងការងារ
- រដ្ឋាភិបាលអាស៊ានគួរតែបង្កើតសហគមន៍ក្នុងតំបន់តាមរយៈការកសាងប្រព័ន្ធយុត្តិធម៌ និងសន្តិភាព មិនមែនតាមរយៈការដកចេញ ការបំផ្លាញ និងការធ្វើអាជីវកម្មជួញដូរ
- រដ្ឋាភិបាលត្រូវតែធ្វើឲ្យជឿនលឿននូវប្រយោជន៍របស់ប្រជាពលរដ្ឋនៅក្នុងប្រទេសរបស់ពួកគេ និងមិនត្រូវសហការណ៍តែជាមួយពួកអភិជននោះទេ
- គោលនយោបាយពាណិជ្ជកម្មជាតិ និងក្នុងតំបន់ និងការវិនិយោគ ត្រូវតែលើកកំពស់អធិបតេយ្យភាពស្បៀង ការងារសមរម្យ ការការពារធនធានធម្មជាតិ និងជីវិតរស់ប្រកបដោយសេចក្តីថ្លៃថ្នូររបស់ប្រជាពលរដ្ឋ
- ការបង្កើតគំរូរបស់រដ្ឋាភិបាលអាស៊ាន ត្រូវតែត្រូវបានប្តូរទិស ដោយដាក់ប្រជាពលរដ្ឋ តុល្យភាព បរិស្ថាន និងសង្គម នៅមុខការសហការ និងផលប្រយោជន៍របស់អភិជន។
៥. សិទិ្ធមនុស្ស និងប្រជាធិបតេយ្យ
- យើងខ្ញុំសូមទាមទារឲ្យប្រព័ន្ធតុលាការឯករាជ្យនៅកម្ពុជា
- យើងខ្ញុំសូមបដិសេធសេចក្តីថ្លែងការណ៍សិទិ្ធមនុស្សអាស៊ាននៅក្នុងទម្រង់បច្ចុប្បន្ន
- យើងខ្ញុំសូមទាមទារឲ្យមានយុត្តិធម៌សម្រាប់ប្រជាពលរដ្ឋជនជាតិភាគតិច
- យើងខ្ញុំសូមទាមទារឲ្យមានច្បាប់ និងគោលនយោបាយទាំងអស់ ដែលចោទប្រកាន់ជាបទឧក្រិដ្ឋដោយផ្ទាល់ និងដោយប្រយោលមកលើ ក្រុមអ្នកស្រឡាញ់ភេទដូចគ្នា (SOGI) ត្រូវតែលុបចោលភ្លាម ហើយ សិទិ្ធរបស់ LGBTIQ ត្រូវតែទទួលស្គាល់ជាសិទិ្ធមនុស្ស ហើយច្បាប់ជាតិ គោលនយោបាយនានា និងការអនុវត្ត ត្រូវតែស្របតាមគោលការណ៍ Yogyakarta។
OUR VISITORS
សមាជប្រជាជនអាស៊ាន 